اه يا بلد - لشاعر الحب و الوطن - محمد عمر

اه يا بلد
عايزه ولد
ييجى و بايديه المدد
و يحقق الحلم الكبير
حلم الغلابه الطيبين
التعبانين الشقيانين
اللى املهم من سنين
يشوفوا الفجر بيتولد
...... اه يا بلد .......
نفسى اشوفك يا مصرنا
تبقى بلدنا كلنا
مش بس للناس اللى فوق
اللى بياكلوا حقنا
اللى بيمصوا دمنا
و اللى ظلمونا كلنا
راجل. كبير. ست .وولد
....... اه يا بلد ........
ركبوكى حبة اغنيا
حجبوا عنينا عن الضيا
سكنوا الفيلل ويا القصور
خدم وحشم داير مايدور
اما احنا سكان القبور
بننام ساعات من غير غطى
و الدم فى عروقنا جمد
..... اه يا بلد ........
اخدوكى حفنه من الكبار
واتملكوا كل الوطن
بقوا هما اصحاب القرار
واحنا الغلابه بدون تمن
نتعب و يسرقوا جهدنا
نزرع و ياخدوا حقنا
وان قلنا ليهم راينا
بالف جلده نتجلد
.... اه يا بلد ....
ربى يا واحد يا احد
ربى يا فرد يا صمد
ندعوك و نرجوك المدد
تبعتلنا هذا الولد
يمكن يرجع حقنا
و اللى خدوه يوم مننا
و نمشى خلفه كلنا
و نسير وراه عده و عدد
....... اه يا بلد .......

شاعر الحب و الوطن
محمد عمر

الشاعر الأستاذ / محمد عمر ( شاعر الوطن كما تقول)
نعم أنت مبدع وشاعر جميل ولكن ألايوجد في وطنك أي شيء جميل تتحدث عنه فمنذ التحاقك في المنتدي لا أقرا لك سوى النقد والنقد .... ارحم وطنك يرحمك الله ولاتجعلني أتدخل دائما في حذف أعمالك مجالات الشعر كثيرة وأسهلها أن تهاجم بلدك
تقبل نصيحتى وأنا رجل عجــــوز أدرك ما أقول
محمد البهنساوي