(الروشته ) للزجال للمرحوم ذكى الشيخ( ابو جمال ) احد رواد فن الزجل

للمرحوم ذكى الشيخ (ابو جمال)

قلت لطبيبى مرتضى ..حاسس بقلبى مش سليم

كشف وقالى فيه صدى..لازم علاج لازم رجيم

وقال ضميرك شبه مات ..الحق قوام بطل نفاق

وقالى خف السيئات.. لا تموت فطيس من دا الوباء

خد منى دم وحلله..وقال لى دمك فيه غرور

لو زاد فى قلبك يقتله..وحاتبقى عرضه للشرور

وفيه كمان مكيروب فتن..معدى وخطر ع المجتمع

وقالى دمك عمتا..مغشوش بميكروب الطمع

منعنى من اكل الحرام.. والمشى ف الزور والفساد

حتى منعنى من الكلام.. اللى اذيته بيه العباد

ونصحنى قال بص لورا.. شوف اللى قبلك هم فين

وكتب لى قرصين صنفره..ع الريق لمده اسبوعين

وحقنه اسمها عيب وتوب مع الفطار عند اللزوم

يمنعنى لو واحد مشى. ما ارغيش عليه وافضل ازوم

خلى الروشته فى فكرتك ..مافيش الم راح يوجعك

وحا تنفعك فى دنيتك.. وف اخرتك راح تنفعك


المصدر من ديوان الزجال (لمسه وفاء )

نقلاً من جروب جروب سرور للزجل والزجالين اصحاب القلم الجسور على الفيس بوك‏