يا قانون العالم يا قضاه
الكل كان رفضه نهائى
ووقفت لوحدى قدامهم
وجريت ورا قلبى واشواقى
وطاوعته ولا سمعت كلامهم
وهى لفت دارات الأيام
ودخلت محاكم وأقسام
ولا عارفه لا أكل ولا أنام
والنفس بلومها ولا المهم
اديته ايامى وعمرى
وقفت ببانى على روحى
سلمته احلامى وامرى
واهو سبنى الملم فى جروحى
ع الحلوة والمره قاسمته
وأنا فاكرة أنى بجد فهمته
وعلى الناس ضحكوا وشمتوا
ويا نفسى بأحزانك بوحى
طلقنى وسابنى لوحديه
فى رقبتى أربع أولاد
ولا فيش ويايا نقديه
ولا عزوه ولا كسوه وزاد
القسوة مع قلبه مرافقه
ولا يعرف ايه معنى الشفقه
ورفعت عليه دعوى نفقه
لجل ما يصرف ع الأولاد
الحكم ومن أول جلسة
بمؤقت ليهم ملاليم
ولا ويايا فلوس ولا ورثة
دانا بعت العفش اللى قديم
مع انه ميسور الحال
ومقاول على طول شغال
بيقبض عنده العمال
ارحمنى يا رحمن يا رحيم
من جلسة لجلسة بتتأجل
وأنا شربه مرارى فى الكأس
يتحروا عن دخله وسجل
يا قضينا ولادى بتنداس
اخواتى وابوى فاجئونى
حسوبى وهما اللى شلونى
على بيتهم وأقوام ودونى
وأنا عايشه على عطف للناس
والحكم اهو واقف على ورقة
يكتبها بأيده شيخ الحاره
وسياتة محتاج كام ورقه
وهجيب له منين أنا محتاره
وهلاحق على ايه حولايه
طلباتنا وأتعاب محاميه
ولا اسرق وأصبح حراميه
ولا أمشى فى سكة بطاله
يا قانون العالم يا قضاه
الرحمة بأولادنا شويه
أتسول وأقول لله
فين الأحكام النهائيه
ولا اكل وولادى أنا طوب
على بال الحكم المطلوب
ينصر الطرف المغلوب
ولا أعيش وولادى منسيه
يا قانون العالم يا قضاه
الرحمه بأولادنا شويه
الزجال
محمدسرور