الدنيا فيها القرش سيد

طول عمرى عايش بالحلال
ولا عمرى يوم مره انحنيت
لكن مراتى ام العيال
وخدانى على بحر غويط

عايزانى ابيع راحه الضمير
وابيع معاه زمتى
اكون منافق للامير
اطاطى علشان لقمتى

وتقولى شوف غيرك سبق
اما انتى لسه فى مكانك
اركب حصانك فى السبق
ودوس بخيلك على اللى هانك

دى الدنيا فيها القرش سيد
والكلمه هى كلمته
وعشان تعيش لازم تسيد
تسبق بحلمك خطوته

قلتلها يا مراتى اعقلى
ارضى بنصيبك فى الحياه
على النعمه ليه تبطرى
ارزاق مقسمها الاله

قالتلى طول عمرك كده
هتعيش وهتموت زى ابوك
الفقر عنك بغدده
والطيبه جنبه بيحرسوك

راح يعمل ايه الكام جنيه
اللى بتخدهم كل شهر
هيكفى ايه ولا ايه
حياتى معاك والله قهر

قالتها ايه بس جرى
دى مش كلامك يا حياتى
عملتى نفسك عنتره
ريحت الطبيخ دى فيه حماتى

دى بقالنا على الحال داه شهور
وكل ما ارجع لوى بوزك
فن النكد عندك بحور
ومشمره وفارده نفوذك

انا قبل ما اتهور عليكى
اوحتى اقول كلمه تهينك
هسبلك البيت بين اديكى
واللى فى ضميرك راح يزينك

نادت على بعلو صوتها
قالتلى على فين يا ابو البنات
موعاش فى الدنيا لو تفوتها
يقطع لسانى انسى اللى فات

معرفش ايه بس جرى للى
زن الودان ليه العجب
الست جرتى اللى قياللى
الله يجزيها هى السبب

قعدت تقوينى عليك
وتقولى ابصر ايه وايه
قادت فى قلبى النار عليك
معرفش ساعتها حصلى ايه

قولتلها فى الدنيا البشر
فيها اللى قلبه مش نضيف
زى الوباء مرض انتشر
وفيها برضه اللى شريف

وانا مش راح اعتب على الجيران
لكن لابد اعتب عليكى
لو جتلك الريح سدى البيبان
وغمضى عنها عنيكى

لحسن رياح الحقد بير
متسمعيش غير صوت رننها
بتموت الخير والضمير
وتنكوى ما بين نيرنها

يا رب عبدك بينادبك
انت اللى عالم بالنوايا
انت الاحد ولا لك شريك
ارحمنا يا رب من الرزايا

عدد المساهمات : 59 تاريخ التسجيل : 27/12/2010

آآميين
بقولها على الدعاء
بالرحمه يا استاذ سرور
ما اقدرش اعلق ولا اقول
وما فيش ف ايدى غير المرور
********

أنا حاسس أن قريب الستات هتغتالك

تقبل مروري

تسلم ايدك يا استاذ

محمد سرور

موضوع جميل شيق

تحياتى