زجال انا / للشاعر هيثم حشاش

زجال انا

وبلعب ع الورق جمباز
وبحقن بالقلم سطري
عشان خطري
يقوم شطري
تخف دماغي من وجعي
بلفظ مجاز
في ناس مخنوقه من قلمي
تخاف منه
وناس بتقول علي سنه
صغير سنه
إكدب ياللي مش فاهم
خبايا الضاد
وهدهد طفل موهبتك
عشان خيبتك
وزيدها عناد
ورش النار عليك بدري
ولا تسوي شوية جاز

انا شايل مابين ورقي
قلم عربيد
يخصّب فكرك النامي
وقدّامي
تبوس قلمي وتبقي سعيد
وعندي ييجي ميت اسلوب
بخرج بيه عن السايد
وبتنوع
وبتغير
وبتزايد
وأكب الحبر ع الصخره
تقيم جنّه
تعيش جنبيها تتهني
وافهم ياللي مش فاهم

انا زجال

انا انقش كلمتي ع الحجر
يدوب الحجر
ويتمسكن
ويتفتفت
في عز انينه يتأنّي
واصدر امر لحروفي
تشيل خوفي
وتتشكل
وتتركب
وتعمل غنوه تتغني
وتفضل غنوه للأجيال
تهد جبال
وتتعمم
وتترجم
وتدي للغات معني


واسيب دنيتي وامشي
ينام رمشي
وتعلي الروح
تبطل بوح
قصيدتي معاك هتستني


وأعيش زجال
واموت زجال



==========
هيثم حشاش

فغلا يا هيثم زجال
تحباتى لقلمك
ووجودك معنا

زجال وزجال رائع كمان كلمات غاية فى الابداع والجمال يا شاعر يا زجال خالص تقديرى لك دائما ابدا

عميق الشكر للأستاذ محمد سرور علي هذا المجهود الرائع في الرابطه الرائعه
مع اطيب امنياتي بمزيدا من التقدم والابداع الراقي

حبيبي واستاذي محمد الحمايل , انت دائما جميل وصديق لكل مبدع يعرف معني الصديق , تشرفت بتعليقك ولمساتك المنيره

قصيده رائعه وموهبه جميله دمت مبدعا

اخى وحبيبى ياهيثم
بلاش تتغر بازجالك
ومشى بكلمتك حالك
وعيش زجال
وبعد الشر ياهيثم
وعيش زجال
*********
كلامك فل ياهيثم