السلام عليكم ورحمة الله وبركاته
ابنى الشاعر المجتهد / محمد مديح
الف مبروك على موقع الرابطة الرائع
واشكرك لذكر الزجال الكبير ابو بثينة
فلقد وعيت على أزجاله من ترديدها لابى وامى رحمهما الله
كانا يحفظان عن ظهر قلب جميع ازجاله ويتندران بها فى جميع المحافل مع الأهل والضيوف
ولذلك فلقد تربيت على كلماته الهادفة الجميلة
ولكم زجليه احفظها نقلاً عنهما تتحدث عن الشاب الذى يتظاهر بالغنى امام اصدقاؤه وهو عاطل وياكل من كد امه المسكينه
صاحبت واحد عالقهوة واسمه شعبان
وبعد ماصاحبته بمده صرنا اخوان
صاحبته لكن معرفتش مستخدم فين
ياكل ويشرب وبيصرف عالقهوة منين
كان لما يقعد عالقهوة نقعد وياه
وكان يقول ان فلانه بتدوب فى هواه
وإن بنت فلان باشا وفلان بيه
بيعشقوه ومش طايلينه حيموتو عليه
وان واحده تلميذة بعتت له جواب
وواحدة تانيه اشتغلت له منديل وشراب
وكل يوم يحكى حكايه ياخوانا ياهوه
عن ناس كتير بيغيرو منو وعن ناس عشقوه
وكات تفوت عالقهوة صبيه اكتر الايام
حلوة وجميله وغنيه وقوامها تمام
النعمه باينه على عينيها واديها سُمان
العز يابنى مايخباشى دا الفقر يبان
رقه فى مشيتها تسبى العشاق
وجمالها مش ممكن ابداً وصفوه فى اوراق
صاحبنا ساعة مايشوفها تلقاه ام طار
ودخل جوه القهوة ووقف محتار
ولما تمشي صاحبتنا تعدى وتفوت
تلاقى وشه مالخضه احمر مزعوط
يقولنا دى علشانى من هنا بتفوت
بتحبنى وبتدوب فيا خليها تموت
ومره واحنا عالقهوة الست فاتت على سهوه
صاحبنا معرفش يفلفص
قالت له امك تيجيشي ليه ياشعبان
قال داحنا نيجى لجل نزوركم
ملناش غنى ابداً عنكم
قالت له لا ياشعبان امك دايماً تكسل
وحياة ابوك ابقى ابعتها علشان تغسل!!!!
اتارى امه غساله تتعب وتدوب وهو ياكل بشقاها
ابن المركــــــــــــــــوب!!
من المؤكد اننى قد نسيت بيت او اتنين
تحية لهذا الزجال العظيم الذ استمرت سيرته حتى يومنا هذا
الشاعرة وفاء امين عضو اتحاد الكتاب وعضو رابطة الزجالين
السبت يناير 21, 2017 8:39 pm من طرف مجدى الهوارى
موضوع: واللى م(ايحاسبش يصبح ع الحديده) للمرحوم ابو بثينه (عميد الزجالين فى السبعنيات) 
