جاره مدرسه

قدامى جارة مدرسه
بشوفها راجعة كل يوم
فتحة بيتها مدرسة
لدروس فى مادة العلوم

وأنا مش بنق ولا اعترض
ولا بحسد الناس والبشر
ولا بخمن وافترض
لكن دا شىء فعلا حصل

لو بس تيجى على الدروس
ما كنت اكتب بالقلم
لكن دى شىء جوة النفوس
خلانى اشعر بالألم

لو عندى بنت واخدة درس
عشان تحسن علمها
الدرس يبقى مسيح وكنس
ويضيع جهودها ووقتها

أما اللى حزنيى وبكيت
خلانى اتنرفز وأزوم
أشوف بنات تمسح فى حيط
وبنات بتنشر فى الهدوم

وكل بنت وليها دور
ودى بنت جايبة خضار وعيش
وبنت بتجيب الفطور
وبنت بنشف فى شيش

والعلم ليه مفهوم جديد
أما النتيجة مش مهم
واديها حطاها فى جليد
والأبهات تحرق فى دم

وسرحت حسيت بالخطر
وبمتهانه ........للبنات
وضعت أيدى ع الوتر
الأبهات .......والأمهات

هما اللى نايمين فى العسل
هما اللى شايلين وزرهم
ولا حد يسأل ايه حصل
بس النجاح بيهمهم

ولا فيش متابعه كل يوم
ولا خدتى ايه وعملتى ايه
عاملة ايه فى باقى العلوم
قوللى ليه اتأخرتى ليه

البنت فى العصر الحديث
محتاجه تعرف عايزة ايه
مش بس أخرتها لعريس
لأ برضه تعرف دورها ايه

البنت محتاجة لكرامة
ومتنحنيش أبدا لحد
لا عبده هى ولا خدامة
لمدرسة عايزلها لحد

البنت محتاجة انضباط
وبرضه محتاجة لحنان
محتاجة تشعر بارتباط
بين أهلها تلقى الأمان