المليونية .. المليونية

من مليونية .. لمليونيه
بين جمعة رايحه .. وجمعة جايه
ميادين بلدنا .. مفتوحه دايما
لحزب حاكم .. أو أغلبية

لا جٍمال حتمنع .. ولا ضرب يوجع
ولا خوف يا صاحبي .. م البلطجيه
شفنا الشهادة .. عشنا الإصابة
حتى الإعاقة .. صبحت عاديه

تقدر تقولي .. أيه اللى صابنا
تعرف يا صاحبي .. سبب عذابنا
مافيش كرامه .. مافيش شهامه
والخوف يا صاحبي .. أصبح هويه

وده أملهم .. يخدم هدفهم
لكن شبابنا .. فاهم حوارهم
لا يوم حيغفل .. عن اللى خدعه
ولا يوم يسلم راية القضيه

ومهما كان اسم المظاهرة
أهدافها سلميه وطاهرة
عايزه اللى يسمع .. يعقل .. ويفهم
لا يقول أجنده .. ولا عملا كافره

قولي يا صاحبي .. الثورة مالها
ومين يا صاحبي .. خانها .. وقتلها
وفين يا صاحبي حق اللى راحوا
ومين تحمل ذنب الضحية

الثورة قامت .. تهتف "عداله"
حرية .. عيش .. و إنسانيه
أيه الحكايه .. ما هو ده اتفاقنا
نفس السيناريو .. والمسرحية