مسحراتى ..
طبلة فؤاد حداد
ندهتنى قبل الفجر
والشمع كان متقاد
وانا كنت نادر ندر
دقيت على طبلتى
غنى النسيم لحنى
بلدى يا نور مهجتى
يا عزوتى و أهلى
بأنده قلوب الناس تصحى وتتسمّع
تملا السحور أنفاس ع الحب تتجمّع
***
غنيت بإسمك يا "حاللو"
باسم الملايكه اللى حلّوا
ورسمت ع الوش بسمه
وأنا حزنى فى القلب شايله
***
فوانيسنا بالنور تلالى
وشموعنا ضاويه الحوارى
والفرحة خنقت دموعنا
ع الراحلين فى الأعالى
***
فاكرينكو أهل وصحابه
وشجون تبكى الربابه
مين اللى يشغل مكانكم
فى الرحمة ولاّ الطيابه
***
رمضان يا نبع الكرم فرحتنا بوصولك
صحت فى قلبى الشجن والسحر بعطورك
خليت دبيب الحياة يسرى فى أيامنا
ردتنى طفل انزهل لما شهد نورك
***
كام مرة شق الهلال , صدر السما بنوره
كام مرة شد الرحال , واشتاقنا لحضوره
ويعود علينا الهلال , باقيين على حالنا
الحزن زى الخِيال , لازق فى أجسامنا
وهمومنا علو الجبال , حوالينا قدامنا
***
يا فجر طال الزمان مستنظرين نورك
يا فرح دق البيبان واغمرنا بحضورك
حط الهموم ع العتب , خطى وصحينا
وانشر نسيم الأمل يهمس حوالينا
واُُحضن عيون الولاد النايمه تحلم بك
وإطوى مرار البعاد , توصل خطاوينا.
د.طاهر كمال