سكة رجوع .... شعر ( عبد الباسط الغابلي )

مفتتح

عنيكي شق القمر

ساعة السفر في النور

وايديكي بليم عفي

لو تكشفي المستور

والحظ لو تبدريه

في أي أرض تبور

ــــــــــــــــــــ

يا مُر ساكن في الضلوع

إمتى تجوع

تُخرج تدوّر في الدموع

عن سكة سالكة للرجوع

كان الأمان هنا دراعنا

وحضن دافي يضُمّنا

صبحت حياتنا مضلّمة

ومقفلة زي التابوت

تاهت عقولنا في الدُجى

خيّم عليها الحُزن موووت

وجفّ م العرق النسب

والطرح آيل للسقوط

كُنا بشر

بتضُمنا وتلمنا

عزوه وصِلات

صبح الفشل من طبعنا

والصرخة ماتت في السُكات

يا غدر عشش على البيوت

إمتى تموت

وتزول جيوش العنكبوت

من ع التابوت

ياللي ما دُبتش في السنين

ولا في الأنين

ولا حتى في

صرخة جنين

أرجوك كفاية ...

عشان خلاص

غرّقتنا

ف بحر الدموع

خلّي النهاية فيها

نقطة للرجوع

ــــــــــــــــــ

شعر

عبد الباسط الغرابلي

عضو إتحاد كُتّاب مصر

تسلم يا مديح

نشكرك يا أستاذ / محمد مديح
ونشكر صاحب القصيدة الشاعر / عبد الباسط الغرابلي والذي هو من أبناء الرابطة واحد أعضاء مجلس الإدارة في التسعينات
محمد البهنساوي