طلقنى ومنك لله

طلقنى ومنك لله

لما الدنيا بتدى الواحد
ينسى عطاء ربه وافضاله
مش يحمد لكن كده جاحد
ع النعمه ويعمل ما بداله
ودى فعلا هو اللى جرى لى
لما اشتد العود ساب دارى
فاتنى ما بين حرتى وافكارى
سابنى وساب البيت وعياله

كن زمان عايشين ع القد
وكنت معاه دايما ع المره
كان الزرع وكنت الارض
ولا زعلته فى يوم بالمره
كان بيشلنى جوه عنيه
وانا برموشى كنت اداريه
واما القرش لعب فى اديه
جانى وجاب وياه كده ضره

واخدين بعض زمان ع حب
واما بيبعد ببقى معاه
كنت الروح وكان القلب
ودلوقتى انا مش لاقياه
مش عارفه ايه بس جرى له
واخد بنت قد عياله
وهى كمان وخداه على ماله
مش عارافه ايه بس غواه

قولى فى ايه انا اكون قصرت
اويوم عمرى غلطت معاك
دانت بتأمر ما اتأخرت
وان طول عمرى وان برعاك
شايله هموم البيت ع كتفى
وعمرى اهو ضاع وياك ولا يكفى
ومش هسمح لك انك تطفى
احلى سنين قضتها معاك

بعد العمر وبعد العشره
بعد سنين قضتها معاه
بعد ما قدت صوابعى العشره
بعد ما كنت اتمنى رضاه
بعد ما كبرت بنتى وابنى
جى بكل بساطه تسبنى
تتجوز غيرى وتتعبنى
طلقنى ومنك لله

الزجال
محمد سرور

بحب فن الزجل والله يا عمى
زى حبى لولادى وابويا ولامى
واعشق حروف كلمته ماشى انا فى سكته
الزجالين والزجل بيجرو فى دمى

كلمات زجلية جميله كنت تحمل موضوع مهم وكعادة اهل الكلمة من الزجالين فدائما ما يضعون اصابعهم على مواضع الجروح ليحاولوا بكلماتهم ان يشيروا الى اشياء غير مقبوله لعل وعسى ان تكن هناك اذان تسمع كما يشيرون الى كل انجاز ولا يفوتهم احساسهم ابدا بان يكون ترمومتر لقياس احوال المجتمع خالص تقديرى شاعرنا وزجالنا الكبير الاستاذ محمد سرور

الشاعر والزجال الأستاذ/ محمد سرور
نص فى غاية الروعة وكلمات صادقة تعبر عن حالة خاصة ومشكلة غاية فى الأهمية رصدتها وصورتها بقلمك الجميل كريشة فنان وسلطت عليها الأضواء بحرفية وجمال وموسيقى لا تخطأها الأذن وهذه هى ماهية الشاعر والزجال الحقيقى رصد السلبيات وإظهارهابأسلوب راقى وجميل والأجمل أنها مشكلة نسائية بقلم رجل وهذا هو الإبداع أن تعيش الحالة الشعورية وتعرضها بصدق لذلك وصلت إلى القلوب ، شكرا لقلمك الجميل الذى يمتعنا دائما بإبداعاته الراقية وتقبل أطيب الأمنيات وأرقها

محمد طه البدحى كتب:: الشاعر والزجال الأستاذ/ محمد سرور
نص فى غاية الروعة وكلمات صادقة تعبر عن حالة خاصة ومشكلة غاية فى الأهمية رصدتها وصورتها بقلمك الجميل كريشة فنان وسلطت عليها الأضواء بحرفية وجمال وموسيقى لا تخطأها الأذن وهذه هى ماهية الشاعر والزجال الحقيقى رصد السلبيات وإظهارهابأسلوب راقى وجميل والأجمل أنها مشكلة نسائية بقلم رجل وهذا هو الإبداع أن تعيش الحالة الشعورية وتعرضها بصدق لذلك وصلت إلى القلوب ، شكرا لقلمك الجميل الذى يمتعنا دائما بإبداعاته الراقية وتقبل أطيب الأمنيات وأرقها

الشاعر والاخ العزيز
محمد طه البدحى
شكرا لمروك وتعليقك الجميل
ولك تحياتى