مين يعرف حبيبتى

مين يعرف حبيبتى

ــــــــــــــــــــــــــــــــــــــــــــــــــ ــــ
لو تسمعوا منى الحكاية كلهــــــــــا
هتصدقونى لما أقول بحبهـــــــــــــا
حالة مابين العشق أو مس الجنون
ولا فيها لمسة إيد ولا نظرة عيون
ولا حتى أجمل حاجة وكتير شكلها

*************************

لكنها بتحبنى من غير حســــــــاب
وقلبها صافى وأبيض م السحــــاب
لو يوم غضبت بلف وارجع عندها

*************************

بتشيلنى فى عنيها وأنا حالى عدم
وقلبى مكسور زى فارس وإنهــزم
بتضمنى وأنا جريح فى حضنهــــا

*************************

بحبهــــــــــا وبتحبنى من غير كلام
بلاقيها آخر الليل مع تراب الزحـــام
صفصافة ع الترعة بتغسل شعرهــا

*************************ا

حبيبتى بالعربى وبالمعنى الفصيــــح
ساكنةعلى السكة وفى بيوت الصفيح
زى الأميرة لما يسقط عرشهــــــــــا

*************************

تايهة مابين الذل والأصل المجيـــــد
بعد الشرف والعز بتدوق الحضيض
لكنها أبدا ماباعت عرضهــــــــــــــا

*************************

بحبها من غير شعارات أو خطـــــب
بحبهــــــــــــــا لو حتى بياعة حطب
بحبهــــــــــا من قلبى وأعشق أهلها
ــــــــــــــــــــــــــــــــــــــــــــــــــ ــــــــــــــــــ
شعر / طلعت الحداد