مش هارجعلك

مش هارجعلك
***

مش هارجعلك أبدا تانى مهما حاولتى مش ها رجعلك
شمـس هوايــا بعـد ما غابت مش ممكن أبدا تطلـعلك

عيزانى أرجع أنا مش هاقدر نهر الحب خلاص اتعكر
انتى اخترتى طريـق الهجــر واحنا لسه فى عز الفجر
***
قلـبك لو بقى نـهر حنان هافضل أبعد عنه واهـرب
وان جه يوم وبقيت عطشان عمرى ما قرب منه واشرب

قلبى عمره ما هايتأثر قلبى ماهوش هو الخسران
قلبك انتى اللى هايتحسر لما يدوق طعم الحرمان
****

قلبك بكره هايفضل ينزف دم كتير يملى بحار
قلبك بكره هايفضل يعزف لحن يبكى ليل ونهار

مش هاتدوقـى تانى عـبير ذى عبيرى مش هاتدوقـى
ولاهتنامى فى حضن حرير ذى حريرى ايه ماتفوقى
****

مقدرش أرجعلك مقدرشى لوحتى سوقتى عليا دلالك
مقدرش انسى أنـك بعتى وعملتى في قلبى ما بدالك

انا شمسى خلاص هاتغيب وعليكى الدنيـا ها تليـل
ولا هابقى تانى ليكى حبيب ولا قلبى عليكى ها يميل
***

محمد يوسف عوض الله

الشاعر / محمد يوسف عوض الله
اهلا بيك ومرحبا في منتدى رابطة الزجالين وكتاب الأغاني
النص جميل من شاعر لديه الموهبة لكن أنا لست معك في الأتي :
قلبك بكره هايفضل ينزف دم كتير يملى بحار
قلبك بكره هايفضل يعزف لحن يبكى ليل ونهار
النزف والدم والكلام الدموي يفقد بريقك الرومانسى وعلى فكرة حزف ذلك لايخل بهيكل النص ولا جودته
محمد البهنساوي