حبر في ورق

ِحبر في ورق

كل اللي كان مابينا
حبر في ورق
إنتي مش في حساباتي
ولافي جدول حياتي
مجرد ورقه فاضيه
طويتها واترمت
في سلة ذكرياتي
حبر في ورق
***
لاحبر ولاورق
راح يحكي يوم عليكي
كتاب قديم أتحرق
وشمُه فوق جبينك
ولونه بلون شبابي
مرسوم مابين عنيكي
كلمه مخنوقة فيكي
ياريتك ماتقوليها
مهما قولتي مهما عدتي
ماهصدق وعد ليكي
وعودك كانت معايا
حبر في ورق
***
الدمعه اللي في عيونك
خبيها مابين جفونك
وشيليها لحد غيرى
لما الزمان يخونك
إرجعي بسنين حياتك
للماضي وذكرياتك
ولو حسيتي عمرك
بيضيع من بين أديكى
ساعتها هتشوفيني
من بين سطور كتابك
حبر في ورق
***
حبر وورق ياعين
وعد ومكتوب علينا
ومقدر ع الجبين
حبر وورق وأنين
من سطر وكلمتين
أصونك تخدعيني
بكلمه من حرفين

حبر وورق كداب
وجراح وسنين عذاب
وقلوب م الهجر دابت
يوم عنها ماحد تاب
حبر وورق مكتوب
و مرمي في كل سكه
ومبعتر ع الطريق
ندوس نمشي عليه
ولا نعرف هو إيه
حبر وورق وقلوب
حبر وورق وذنوب
حبر في ورق
(طاهر الصوفاني)