زلزال أسمه التحرير للزجال محمد سرور

زلزال أسمه التحرير

يا شباب مصر المتحنى بدم الشهدا ونهرالنيل
يا سواعد حره أبيه رفضت ظلم وقهر وويل

رجعتوم الحريه لشعب ماليه الخوف أعوام
زلزلتوا عرش الظالم وقهرتوا كراسى الحكام
وطالبتم بالتغيير فى ميدان تحرير حققتوا احلام
مين فينا خطرعلى باله أن عياله رجال الجيل

رجعتوا لمصر كرامه كانت غايبه بقالها سنين
أصبحنا فى عصر شباب والكل يهاب م المصرين
دا يناير ويا وشبابها الثاير فخر ليوم الدين
ولا عدش خلاص فيه ظلم وظالم ولا كرباج وذليل

ولأول مَّرة اختار بإرادتى ريسنا ولا اخاف
وهيحكم مده أو اتنين مش يبقى السياف
هنغير فى الدستوروهنلغى الزور وهتكلوا خشاف
ودى كله بفضل ولادنا عشقه بلدنا وهما دليل

وهيبقى عندنا مجلس شعب وشورى من غير زور
وهنلغى من مضبطه موافق اللى بدعها سرور
هنقح فى القوانين والمحتكرين يلبسوا طرطور
يحميك يا شبابنا الباسل نورت فى مصر القنديل

صفوت مع عز وابن العادلى خونه ونهبوا كتير
غير وزارا رجال أعمال جالهم زلزال أسمه التحرير
فين يوسف والى الظالم ويا الشاذلى أبو كرش كبير
كله له يوم ولمين هتدوم ربك جبار وجليل

والجيش المصرى ثبت نصرى ومش أبدا ناسينه
وحمى الثوارما ضربش النار صامد ثابت فى عرينه
شال كل شباب الثوره فى دقه قلبه ورمشه وعينه
ميت الف تحيه لكل الشهدا ولجشنا اللى نبيل

م اليوم اياك تدفع تانى رشوه أعرف حقك فين
حارب فى فساد دور ع الزاد وتكون صادق وأمين
الثوره دى ضد فساد النفس وفساد الظلمين
دمك يا شهيد فى ينايرعيد ع الظالم هم وسيل
يا شباب مصر المتحنى بدم الشهدا ونهر النيل
يا سواعد حره أبيه رفضت ظلم وقهر وويل

الزجال
محمد سرور