يا كل ستات مصر تشبه لزوجتنا للزجال محمد سرور

يا رب عالم بحالى والنبى ارزقنى
لجل الوليه مراتى اللى بتخنوقنى
مبهديلانى عشان رزقى بقى قليل
نسيت ليالى الهنا بتقولى طلقنى

وانا اللى عمرى انا مابخلت بالمره
صبحت حياتى معاها علقم سنين مره
وكان معايا الفلوس وهى ناسيانى
مردش اقسى عليها واجيب لها ضره

كان كل شىء تطلبه بالنظره يتحقق
ولا كنت احسب لها واحسابها وادقق
دلوقتى فين يوجعك وانا مالى اتصرف
متقولى ايه لزمتك تزغرلى وتبرق

من بعد ثوره يناير حال البلد بقى صعب
وقف دولاب العمل عايشين حياتنا فى تعب
وان ميلت على ده وده ملقاش معاه ميلم
مش بس حالى انا دا حال بقيت الشعب

واللى يزل الرجال يا صاحبى هى الفلوس
ولو معاه الخلايق تجرى فى ايدك تبوس
والحرمه تبقى ملاك شيلاك فى ننى العين
وان مال عليك الزمن الكل فيك بيدوس

لولا ستر رب العلا ما كنت القى الزاد
صابر على شرها لجل الصغار لولاد
ايه بس ايه ذنبهم يتمرمطوا بينا
ويبضعوا بينى وبنها لو زاد ما بنا عناد

الست عايزه الراجل جيبه يكون مليان
ولما يفضى يا ويله من قلبه النسوان
والادهى ربى رزقنى بنوع فريد جدا
فى الشده ولا الرخا دايما بص لسان

يا كل ستات مصر تشبه لزوجتنا
الرحمه لجل النبى مررتوا عيشتنا
ما كفايه حال البلد هتبقوا انتو كمان
يا رب اقصف رقابهم لا اما موتنا

الزجال
محمد سرور

استاذ محمد سرور
كلام ممتاز بس موضوع يودى فى داهيه
انت عارف احنا مش قدهم ههههههه
المهم انا هقولك على حاجه انت عارفها كويس
مثنى وثلات ورباع بس رسالتى وصلت
تسلم ايدك مرة تانيه على القصيدة
اخوك هشام النبتيتى

يا بن سرور قلتلك...............

احنا نون النسوة

والنسوة فيها اصيل

وفيها اللي ما تسوي

حظك قليل وعليل

ماشي بدون كسوة

دة الصبر آخرة جميل

لجل الولاد ....تسوي

**************

تقبل تحياتي

هشام - النبتيتى كتب:: استاذ محمد سرور
كلام ممتاز بس موضوع يودى فى داهيه
انت عارف احنا مش قدهم ههههههه
المهم انا هقولك على حاجه انت عارفها كويس
مثنى وثلات ورباع بس رسالتى وصلت
تسلم ايدك مرة تانيه على القصيدة
اخوك هشام النبتيتى

شكرا يا استاذ هشام
لمروك
بس انا مش معاك
احنا قديهم
ههههههههه

سلوى سيد عبدالعزيز كتب:: يا بن سرور قلتلك...............

احنا نون النسوة

والنسوة فيها اصيل

وفيها اللي ما تسوي

حظك قليل وعليل

ماشي بدون كسوة

دة الصبر آخرة جميل

لجل الولاد ....تسوي

**************

تقبل تحياتي

والله انتوا يا سلوى
نون العكننه الكبرى
منكم يجيب النقطه
وتشبه الكبرا
ومن غيركم هتبقى تمام
واسالى مجرب
واسألى الخبره

ياللــــى حياتك نكد

دارى علــــى بلوتك

وان كان فى بالك هدد

احسب كتــــير خطوتك

خليــك يا صاحبى وتد

واثبت علــــى سكتك

ربك بايــــده المدد

ويفكلك زنقتــــــك

تحياتى

فاكهة المنتدى