اذن يافجر الحق

بسم الله الرحمن الرحيم
السلام عليكم.
تعريف / انا واحد بيحب الزجل اسمى حسن الجمال
قريت شعر عمنا بيرم التونسى وصلاح جاهين وقريت لعبد الرحمن الابنودى وفؤاد حداد وغيرهم ولى بعض المحاولات الزجليه اللى انا مقطنع بيها لحد كبير وطبعا مش كفايه انى ابقا مقطنع بيها احب اعرضها على الناس هنا بما انهم اهل الفن ده واشوف برضه رأيهم .على فكره انا عندى 28 سنه وباكتب من ثانوى. يارب ماكنش ضيف تقيل عليكم
اذن يافجر الحق اظهر ياصبح النور
خلى الظلام ينشق حطم قيودك ثور
النصر بابك دق ياشعبنا المنصور
وعرفنا قولة لأ للظلم ويا الزور

دم الشهيد يبدأ علشان نعيش أحرار
بالكعب بندقدق طول عمرنا ثوار
وفجرنا شقشق وقضينا ع اللى جار
والطير أهو زقزق والليل طلعله نهار

ان الأوان للجد نجنى بايدينا الخير
ونقول لأيها حد مش محتاجين للغير
والقمح مالوش حد والقطن بالقناطير
ويفيض مالا يتعد والباقى للتصدير

والهمه فى المصنع تخلعنى من اسرى
كل البشر تسمع عن ابننا العصرى
والجندى بالمدفع قادر على نصرى
وطبعا الأجدع دايما يكون مصرى

اشكركم لسعة صدركم
ارجو التعليق

جميل يا اخ حسن هذا الكلام الجميل وواضح انك فنان بجد وبتخبي علينا
تقبل تحياتي

الأخ الأستاذ / حسن الجمال
أنت مشروع زجال كويس جدا وربنا يوفقك ... ولكن قبل ان اترك صفحتك أهمس لك بضرورة الإهتمام بتدارك بعض الأخطاء الإملائية ( مثل مقطنع وصحتها مقتنع ــ ونقول لأيها حد وصحتها لأيه حد .... ولولا تكرارها كنت اعتبرتها أخطاء كيبورت
اتمني لك التوفيق يا أستاذ حسن وزجليتك جميله

طبعا أنا مبسوط إن حضرتك علقت علي الزجل ده . أنت والأخت سلوي وبشكركم طبعا علي الثناء ده . وبالنسبه للأخطاء الإملائية فهي مسألة سهو.... أوعى والنبي ياأستاذ محمد تكون فاكر إن أنا ماعرفش أكتب. . تحياتي لحضرتك والأستاذه سلوي ولكل أعضاء امنتدي قصدي المنتدي

بدايه قويه ياأخ حسن وان شاء الله بكره تبقى زجال كبير أفكارك حلوه ومتمكن من أدواتك أتمنى لك كل خيروازدهارونقرا دايما شغلك الجميل

تسلم يا حسن الكلام والنظم جميل

ويارب اعيش واشوف اللى انت قولته

الاحلام سهل والامل جميل

بس اللى يسعى له

تحياتى

وارجو استمرارك فى الكتابه

موهبتك واضحه

تحياتى