الحلم قصيدة عامية بقلم حازم كيوان

الحلم
ضفاير نور من الشمساية نجنيها
لتاج عرسك في يوم فرحك بنهديها
وشمعاية ف أيد كيوبيد يطوف بيها
وألف حورية مالجنة بضحكه الحب ماليها
وعود ياسمين ودقة عود وغنواية بغنيها
في يوم فرحك
***
كفوف شعبك شموع أيدة على نيلك
بدعوتها لرب الكون، و بتغني مواويلك
رموش عيني من الحاسدين تغطِّيكي
وخطوة عفيَّة في المسعى وشوط سابع بيرقيكي
وضحكاية مع الدعوة بوزعها وبغنيها
في يوم فرحك
***
عريسك جاي بهليلة وفرسة وسيف
فارس والناس بتتحاكى معندوش زيف
كلامه أحلى م النسمة فليل الصيف
مباخر نور
وباب مسحور لدنيا العدل ماليها
في يوم فرحك
***
وليلة الفرح
رسمت الكوشة في عيوني
وحنيتك بنور عيني
وحميتك بمسك الخير
( أنا كنت بحلم
أنا كنت فاكر فالأيدين حاجة بصحيح
قصر افتكرناه من دهب وطلع صفيح
لا .. ده كبوس
وكبوس ودايس .. على حلم متكسر
غلة سنين العمر ضاعت مننا
وسرقها سوس)
جيوش البوم
عساكر… شوم
وستين كلب
وسيف الفارس المكسور
وشعبك ليه يبات مقهور ؟
تعالي يا مصر … جوبيني
تعالي قوليلي ليه يعني
أعيش والقلب يوجعني؟
عشان مصري ؟
ياشيخة تغور ياشيخة تغور
***
لو بكرة ينسى ضحكتك مش راح نعيش
أصرخ وعلي صرختك صحي اللي نايم
و اوعى تسميها جروح …لا قول غنايم
***
أنا آسف يا ست الكل
ده جرحك كان على عيني
مكانك لسة فوق راسي .
ترابك كحل
وخيرك توب مغطِّيني
لكن لسايا مش ناسي مرار الذل
وشقلبتي و موازيني
وألف عميل علي عرشك
فعز الليل على فرشك تلاقي كلاب
وصابرة يانعسة عالمكتوب
هاكون أيوب
وها حكي القصة بالمقلوب
بدم الفارس المغلوب هنرسم باب
مبين الدنيا والآخرة ملوش أعتاب
يعدي منه عزالك … ياست الكل
يعدي منه عزالك… في يوم فرحك
شعر: حازم كيوان
عضو نادي أدب القناطر الخيرية
ورابطة الزجالين بالقليوبية

محمد البهنساوي كتب:

الشاعر الكبير الأستاذ / حازم كيوان
القصيدة بها مساحة كبيرة من الصور الإبداعية واحترت كثيرا في أختيار المقطع الأجمل ولم أجد أجمل من تلك المقطع من وجهة نظري المتواضعة
أنا آسف يا ست الكل
ده جرحك كان على عيني
مكانك لسة فوق راسي .
ترابك كحل
وخيرك توب مغطِّيني
لكن لسايا مش ناسي مرار الذل
وشقلبتي و موازيني
وألف عميل علي عرشك
فعز الليل على فرشك تلاقي كلاب
وصابرة يانعسة عالمكتوب
هاكون أيوب
أنا سعيد بتواجدك معنا في هذا المنتدي واستمتعت
لك خالص مودتي

الشاعر الغالي وأستاذي الجليل محمد البهنساوي
شرفت بتوقيعك الراقي الذي أعتبره شهادة ميلاد لحرفي المتواضع
دمت بكل الخير ودام خير مدادك الكريم
حازم

مخبى الحاجات الجميلة دى عننا ليه يا دكتور - أول مرة أشوفها -

محمد هباش كتب:

مخبى الحاجات الجميلة دى عننا ليه يا دكتور - أول مرة أشوفها -

الحبيب محمد هباش حضورك شرف وتوقيعك قلادة على عنق القصيدة سعدت بالحضور الجميل
دمت بخير ودام خير مدادك النبيل
حازم