بيئه (عشوائيات)

موتونا .. مات أبونا .. مين حيسأل عننا؟
سمدونا .. سممونا .. لينا مين .. غير ربنا؟
ابنوا عشرات المصانع .. في المساكن .. وسطنا
زودوا حجم العوادم .. والنفاية .. حولنا
كدسوا "تل" القمامة .. انشروا الرعب في سمانا
والعلاج .. أصبح هوايه .. للى "ماهوش مننا"
سرطنوا أنفاس رئاتنا .. كمموا أفواه آهاتنا
عذبونا .. أو بيعونا .. بكره .. يرخص عمرنا
ضغط عالي .. فوق بيوتنا .. ضغط .. نشف دمنا
والمجاري .. طفح دايم .. في شوارع حينا
لوثوا شريان حياتنا .. نيل بلدنا .. مهدنا
جرفوا الأرض اللى جاعت .. لما ماتت أرضنا
رحمة الله .. على الضحايا .. والولايا .. والضعيف من أهلنا
ادعي يا إنسان معايا .. وانت لا ترضى الإهانة .. والسكوت .. من ضعفنا