الحصاد والخير

فلاح وفالح وعنده م الخلف ولدين
وموالى أرضه وواصل النهار بالليل
الطرح طاب ع الشجر والقمح زاد ضعفين
وفى الحصاد قام فرح جوز حسن وحسين
والبنت جهزلها من غير سلف ولا دين
مخلص قوى للوطن بيته القديم ييابين
باب لاجل المواشى والحبوب والطير
وباب لاجل الكرم من صنع ام الخير
دلوقتى رحنا المدن عشان نجيب رغيفين
مع فرخة بيضه يادوبك عمرها شهرين
ولكن تقيلة قوى .ومبرطشة الرجلين
الصحة اهى اتدهورت ونهارنا ا صبح ليل
م السعر ويا التجار شوفنا المرار والويل
وماتت أم الهنا واتشتتوا الولدين
فلاح وفالح وعنده م الخلف ولدين

زجال من الطراز الأول
بارك الله فيك .... أتمنى الحضور إلى مقر الرابطة للتعرف عليكم
محمد البهنساوي

اشكر لكم رايكم الذى اعتز به واعرف سيادتكم باننى عضو بالرابطة
من أيام الشعبينى وحتى الآن ويشرفنى رئاستكم للرابطة
وشكرى واعزازى لحبيبنا البهنساوى وان شاء الله لزيارتكم انا ناوى
ونعيد ليالى زمان والسهر ع القهاوى