قصيدة فضفضة

جربت حد يوقفك مره فى كمين
شوفت المعاملة
معاملة الباشا الأمين
تقولشى حاوى
بنظره واحده ينزلك من الميكروباص
ويدلعك
ويشخلعك
ويبهدلك
ويمرمطك
واما تتجرأ وتسأل حضرته يقول اشتباه
يبقى انتباه
ممنوع كلام
هو انت عارف انت مين وهو مين
دا حضرة الباشا الأمين
*****
مش عارف افرح
مين اللي سرق الضحكة مني
مين اللي خد طعم النهار
مين اللى خلى الطير
يطلق صرخات الانهيار
الطير اللي مبيفهمش حاجة بينتحر
ونلوم على اللي يفهموا
ويقولوا آل أتكلموا
فضفضو
واملو الكتاب
ازاى اغني وف عيوني لكل شيء نظرة عتاب
الصبح كان ليه طعم تانى
كان ليه معاني
دلوقتى بامسك القلم بلقاني عاجز
بلقانى زاهد في الكتابة
والقانى مش شايف مشاعري
الكون ضباب والدنيا زحمة
والبركة راحت
*****
و اضطر اسرح في دنيا تانيه
عشان أحب
وأصوغ حبيبتي بيتين غزل على شوق ولهفة
وارجع لدنيتنا الكئيبة
واكتئب
زهئان يا نفسي
زهقت من الناس والحياة
وزهقت مني
عايزنى ليه ارجع لاحزانى اللي بهرب منها
متسيبوني جوه شرنقتي اللي محبوس جوها
ما أنا لما غرقت في همومي ومشاكلي
اكتأبت
ومن الحياة والناس تعبت
زهقت
الزبالة في كل حته
والهوا مليان هباب
والعجوز أتصابى تانى
والشباب مبئاش شباب
والقدوة غابت عن عنينا
والشمس غابت في السحاب
والبوصلة باظت
واتلغبطت كل الحاجات
الشمال بقى في اليمين
واليمين بقى في الشمال
وحالنا مال
ويقولوا نكتب آل ونبدع
نفسي اعرف مين اللي قال
*****
طهئان وحاسس بالملل
باضطر أتوه واسرح تملى
عشان ما اشوفشى اى حاجة
وان شوفت باعمل آل ماشوفتش
وأما الضغوط بتزيد عليا
باضطر أزود جرعات الابتعاد
ما أنا أصلى مش ناقص عناد
باحط الام بى ثرى في ودني
عشان ما اسمعشى اى حاجة
وبا ابص تحت رجلي
عشان ما اشوفشى اى حاجة
وانعزل أنا ويا نفسي
وبعد فتره لما بارجع
وأحس انى هديت شوية
الضغوط تزداد زيادة
زى عادة
فانعزل من تانى اكتر ولفترة أطول
لما هويت الانعزال
وأما رجعت في آخر مره
استغربت
لما لقينى ناسى بجد
نسيت حاجات ماكنشى ينفع تتنسى
يا حسرتى
يا غربتي
لقيتنى أصلا مش فاكرني
مش عارفني
لا كنت فين
ولا ويا مين
طب إيه اللي كان
اكتشفت الأزمة وازداد العذاب
وابتدت تظهر عليا
أنواع جديدة من الاكتئاب
*****
صوتي مخنوق جوه منى
حاسس انى سجين في روحي
حاسس انى سجين جروحي
حاسس انى خلاص باهيس
حاسس انى بقيت بليد
حاسس انى مش سعيد
حاسس انى مش كويس
حاسس انى في اغتراب
حاسس انى مليش صحاب
ولاعدش فيه صاحب كويس
*****
كلنا بنقول حرام
كلنا بنقول كفاية
بنادى ونقول احترام
ومبنمشيش غير بالعصايا
عيشين في حالة من التناقض
عايشين في حالة من الانهيار
كلنا بيغلط وماله
وغيرنا يغلط يبقى عار
لو نبص لنفسنا مره بتأمل
بصة جادة مجردة
ممكن منعرفشى إحنا مين
جربت تعمل ويا نفسك يوم كمين
جربت تعرف أنت مين
رايح لفين
مين اللى ظلمك
طب وأنت ظالم مين ومين
جربت تعمل ويا نفسك س و ج
عارف عيوبك
طب من انهاردة ياريت
متبصش لغيرك
خليك في نفسك
وأما تخلى من العيوب
أبقى عيب وأبقى لوم
إنما
وبما أن هذا لن يكون
خليك في نفسك أولا
نفسك بداية الكون