زحمة سير (للشاعرة هناء سعيد)

زحمة سير

وبحس
النهار فاضل
وباقى معايا منه
كتير
مصاحبنى
ف زحمة سير
مآنسنى أنا والغير
مواعدنى
يقابلنى بفرحة وبُشرة
تِسْعدنى
تصبّحنى صباح الخير
صباح الخيرعلى عيونك
يا شمساية
ولسة يادوبها راح
تشرق على الايام
تسلمنى نهار يُبدُر
بشاير تملا دُنيتنا
مآذن خضرة لجوامع
تجّمع بين كنيسة ودير
تسّمعنى غُنا العصافير
تفرّحنى
بأرض عفيّة راح تطرح
سنابل قمح مروية
ولا تمنع خطاوى السير
ولا تسمح لأى مرور
وبيعادى
صباح نادى
لعم هلال وبينادى
على المشغول وع الفاضى
على الماشى
يقوله تعالى يا ابنى ودوق
بليلة طعمة حلوة يا ذوق
ونسترزق ف صُبحية
وتنده ست حُسنية
بربع جنيه ياعم هلال
بليلة وهات من القدرة
بخمسين فول
وعم هلال يبص لفوق
وعندك
فول بنص جنيه
مع رغيفين
لتسعة من العيال
قاعدين
على شلتة وطبليّة

وعينهم باصة مُشتاقة
وطالبة الفول بِحنّية
ومش طالبة
كلام عافية ولا خناقة
أملهُم لُقمة وهنية
تِشبعّهُم تكفيهُم
ولو مية (100)
وقوتهم
يعنى حَبة فول
ولُقمة
فاضية وان طالت
ولا تطول غير
شوية
مية من غير فول
صباح النور
ياقمراية ونور ونّاس
دا نورك كُحلة ومْرَايا
وحاضنة الشَنطة والكُراس
ورايحة المدرسة بدرى
تشوفى دُنيتك تجرى
مع الأصحاب وبطفولة
وضحكة بتلعبوا الأولة
ونداغة وعسلية
وأحلام حلوة لصبية
وفارس
فوق حصان أبيض
وصُحبة
ورد فى الكوشة
ف يوم العُرس والزفة
وعُملَه نحاسْ ومْنسية
لكين بترابها مكسية
وتتراهنوا
ومين راح يبدأ الرّفة؟
ملك إحنا كتابة إنتوا
وايه المعنى؟
هانفتح مُعْجم التفسير
ملك معناها عارفينُه
ملك يعنى
أبوه سُلطان
ومتسلّطن
بقا له زمان
وراسم خطة للتسيير
هدفها
الهد والتدمير
ملك يعنى
خليفته أمير
وبينهم حُب وحبابة
ودى كِتابة
كتابة وحِبرها سِرى
ومش متشافة شافيينه
وجع ياما وسوء تفكير
مفيش تغيير!!!!!!!!!!
مفيش تغيير !!!!!!!!!

شكرا يا مديح على النقل
تسلم يا باشا

عدد المساهمات : 50 تاريخ التسجيل : 06/11/2010

شكرا جزيلا يا مديح على النقل

دمت ودام مجهودك الرائع

دا غير يا مديح ان استاذه هتاء
تجيد حرفيه الالقاء
فنسمع منها القصيده
ببراعه واتقان
شكرا على النقل

عدد المساهمات : 50 تاريخ التسجيل : 06/11/2010

الاستاذ الفاضل الزجال / محمد سرور

اشكرك على المرور وعلى الثناء فأنا اتعلم

منكم دمت بخير وسلام

» ألف مبروك صدور ديوان الشاعرة هناء سعيد
» رثاء (خالد سعيد)
» عزاء واجب وفاة والدة الشاعرة هناء سعيد
» أغنية اتعودت للشاعرة منى الغريب
» نرحب بالشاعرة الرقيقة / هناء عبد العظيم خالد