كوم الزهير ( قصة حياة شاعر )

[center]كـوم الـزُهـيـر

التوتة رامية غُصنها السارح
نواحي " الشيخ عُمار " فوق قبّته
والنسمة بتلاعب ورقها .. تهدهده
قوم يبتسم ويزيد جمال
وفروعها تحضن بعضها
وإحنا بنعلب تحتها أنا والعيال
ونلم غطيان الكاكولا أمات فِلل
ونروح " لأمين السنكري "
يعمل لنا صفافير صفيح
ونسن في سيوفنا الجريد
علشان حروب

ها تقوم ما بينا وبين عيال
غرب البلد
وندور نلم ف بعضنا
علشان يكون لينا الهجوم
والناس تزيط من غُلبها
ومن الُعُفار
هو انتو ما عدّاش عليكو
ف يوم خِشا
و احنا ولا كنا هنا
والضرب شغال رغم كل التهديدات
ما تقولشى بنحارب يهود

*****

أمّا الحريم
قُدام طرمبة " عبحكيم "
كانوا كل يوم
يتلموا ساعة العصر يحكوا لبعضهم
مرة على جنينة " الضعيف "
وع الدريس اللي جابوه
وملوا به زناقير البيوت
وع الخبيز
وطاحونة " الشيخ إبراهيم "
أو عن ركوبة
حدّ عدّابها و عفاهم
إنها ديك النهار
كان جابها ليه " صابر شُتت "

با تنين جنية
ويقوموا وقت المغربية على اتفاق
إنه اتغلب
من قبل ما الرجالة تيجي من الغيطان
وتطلّع القعدة على عنيهم
نكد
*******

والليل يعتّم كل ضيّ
ونروّح على بيوتنا وفوقينا من الحروب
أكوام تُراب
وآخرها علقة تهمد الجسم العفي
والدمع يغسل وشّنا

والصبح ييجي يلمنا
وسط الغيطان
من بعد ما نروح " العزازنة "
ونصلي ويّا " الشيخ علي "
وهو بيمد الآيات
ونقول آمين
كُنا كمان
بالطوب نحرجم أعلى نخل
وكان يحرجمنا ببلح
ناكل ونرمح ع الطيشان
و يعدي " بكر "
ينادي في ولاد الحلال
عن عنزة بيضة اتسرّبت

أول عشيّة
واللي يلاقيها
ليه حلاوة عشرة صاغ
وندور وراه
و عصايته تجري عشان تفرّق شملنا
ولا أي شئ بيهمنا
وكان همّنا
إن احنا بعد الضهر ها نسمّع
في كُتّاب البلد
والشيخ تشوفه ف قعدته
راكب جَمل
و عصايته ملزوقه ف إيديه
لكنه كان طيّب قوي

وكان يقول : إحفظ يا واد
خليك جَدَع
و بلاش دلع
" عبدايم " اسمه وكان ياخدنا
لمّا نوصل قد سمع
علشان نسمّع في الإدارة
وكان يقول :
اللي يفوز
من جيبي ليه قرشين صحاح
*****
وشهور تمرّ
وسنين تمرّ
ومر ساقياه الطواري لعظمنا

في العصر بعد المدرسة
والصُحبة فرّقها الزمن
ولا عادشِ لعب يلمنا جنب المقام
والتوتة نشفت م الزعل
وقالوا لنا ماتت
أصلها عاشت كتير
شافت موالد الجدود
رقَصت في أفراحهم
تقولشى مُهرة مدربة
وصعب عليّا قطعها
وزرعت غيرها في الملق
ورويتها من عرق الصبا
وحكاوي كان يحكيها لينا

عمِ " قطب "
وكتابي تحت النخلة قاعد
كنت أروح له
وكنّا نحكي لبعضنا
لحد ما يحلّ الغروب
ويجرّ خيط النور وراه
و يروّحُه
*****
وكمان سنين جريت قوام
فيها الغروب كان كل فترة
ييجي يا خد
حد م الصُحبة الجديدة
والشيب عرف سكة دماغي

وزرَعَها حيرة
و كام سؤال
من بعد ما زرعة سنيني فرّعت
بتلات فروع
ماعرفشي ليه
مش لاقي طعم الفرحة
جوّه عينين لعبهم زي ما شفته زمان ؟
والبسمة وقت اللعب
إن كان بتيجي تروح قوام !
حتى الغيطان
رَمحت عليها بيوت كتير
خلّتها تبعد
خلتها ترجع هي والنخل لوَرَا

و القعدة شايها ما عادشِ شاي
طعمه اختفى
فوق الوابور
والناس خلاص
ما عادتشِ فاضية
للقعاد
أو للحكاوي في ضِلْة السَجَر الكبير
أو في العِشش
عمّالة تجري ورا الرغيف
والدِشِ لامم كل عين
جوا القهاوي اللي اتبنت
حتى الشباب
هجّت من الطورية وتعبها

للمدن
وكلامهم اتغيّر قوي
بقى زي ما يكون أصلهم
مش من هنا
الخير كتير
والبركة شحّت في الإيدين
والناس بقت أكتر كتير
من ناس زمان
بس النفوس متغيّرة
ولا حد بينادي الكبير
يابا فلان
يرحم زمان
و ايام زمان

يمكن أنا حاسس كدا
ولا عشان ما فارقتهاش
لكنّي خايف ييجي يوم
وانده لها
ألقى الغروب واخد معاه
أجمل سنين
ناس طيبين
الحِدّة فيها اتشرّبت
بالطيبة والأصل النضيف
ناس فيها خير
خايف في يوم ألقى الغروب
واخد معاه
" كوم الزهير "

عدد المساهمات : 60 تاريخ التسجيل : 30/07/2010

الله عليك يا استاذ جابر

تسلم الايادي بجد روعة في التصوير

رجعتني لزمن الصفاء زمن الطفولة الجميل

حسيت وانا أقرا القصيدة بريحة البلد وجمال الريف

قصيدة بجد روعة الروعة لما فيها من سلاسة وتصوير

تحياتي وكل تقديري صديقي العزيز
.........

الأخ و الصديق الشاعر الكبير يسري حنفي

أشكر مرورك الراقي على أعز إبداعاتي

كوم الزهير التي قمت بنشرها في أكثر من منتدي

ليفرح معي أحبابي فقريباً جداً بإذن الله

سوف يتم نشر خبر بخصوصها

تحياتي لأخي الحبيب

الزهيري

الله عليك ولا تعليق
لأنى والله مانا عارف اقول ايه قدام ابداعك يابو ادهم
كل اللى اقدر اعمله انى أبدى اعجابى الشديد وعجزى عن التعبير امام ماابدعت
تسلم يابو ادهم
وربنا يديم عليك الابداع وحسن البيان
مع ودى
اخوك الاصغر حسن الجمال

أخي الرائع و الشاعر المتميز حسن الجمال

مرورك يزيد فرحتي بالقصيدة و ما سوف اعلنه عنها قريباً

دامت مودتنا

أخوك جابر