بهية أم دنيا

[center]
بهية أم دنيا

منك لله يامه !!!!

000000000 أسندت الأم رأسها بعمود السرير النحاس الذى ورثته عن أمها وقد اسودت الدنيا فى عينيها
وأخذت تحدث نفسها: أنا كنت عملت أيه
الحق علـــىّ جوزتك أحسن جوازة المعلم يونس تاجر البهايم 0
بنى لها بيت دوريــن لوحدها بعيد عن نسوانه الثلاثة 0
كان عنده أمل إنها تجيب له الولد اللـى يورثه
ومااتجوزهاش إلا لما عرف إن أمهـــا خلفت ثمانية صبيان وبنـــت واحدة
وقال : هى دى 0
وكان شايلها على كفوف الراحة 0
الراجل اللـى السوق كله يخاف منــه طول ماهى حامل كان يشيل لها الأكل لحد السرير 0
صحيح هو كان كبير عليها شوية لكن الراجل مايعيبوش غير جيبــــه
0ايه يعنى خمسة وخمسين سنة ودنيا مش صغيرة دى كانت فى أولـــه إعدادى لما شافها وجه دفع لها على الشاى ميت جنيه ورقة واحدة عمرى ماشفت شكلها قبل كده
حتى أبوها الله يرحمه فضل طول عمره يشتغل عند الناس مفيش مرة دخل علىّ بعشرة جنيه 0 صحيح باع القيراط بتاع أمـه عشان يدخلنى المستشفى لما تعبت وأنا بولد دنيا
الدكاترة قالوا لازم عملية والدكتور حلمى يومها قاله: ياعم مصرى مش قلت لك كفاية عليها تمــن مرات فى عشر سنين ياراجل دى لو كانت جاموسة كانت وقعت 0
وجت دنيا والدكتور ربط لى وأبوها وقع بعد سنتين من الهم اللى كــان شايله ياحبة عينى طول عمره كان نفسه فى ولد وبنت بس
وكان دايمــا يقول لى : نقدر نعلمهم أحسن علام ونلبسهم أحسن لبس ونفسحهـــم !
كان بيحلم !! لكن أبوه من ناحية يقول له : العيال عزوة يابنى يسنـدوك وأنت كبير 0
وأمى من ناحية تانية تقول لى : إربطيه بالعيال بدل مايشوف له شوفة تانية 0
وأهو الإثنين ماتوا وارتاحوا واحنا اللى شلنا الهم
الراجل قعد محجوز فى المستشفى بتاع المركز يتعالج من الفشل الكلوى اللى جاله من البلهارسيا من شغله فى الغيطان عند الناس
وكنا كل يوم نقول هيرتاح لحد ماربنا افتكره 0
واخواتها سابوا المدرسة 00اللى اشتغل استرجى عند المعلم عزمى وأخــد أخوه معاه وعلمه شرب السجاير 0 واللى اتلم على شوية عيال فاسديــن ومسكوهم بيسرقوا تسجيل من عربية الأسطى نعمان والراجل طلع طيــب ومارضيش يوديهم المركز ياريته كان عملها وكانوا حبسوه ولاكانش طفش وماعدناش عارفين عنه حاجه 0
ولولا الواد محمد والقرشين اللى بيجيبهم كل أسبوع أشترى دوا السكــر بتاعى
وأهو كان بيساعدنى فى تعليم دنيا 0
لكن بعد مااتجوزت المعلـــم يونس الراجل ماخلناش محتاجين حاجة
حتى العيال كان واخدهم يشتغلـوا عنده 0
لكن بعد دنيا ماجابت البت الأولانية زعل قوى ونسوانه قالوا له : اخلص منها 0
لكن أنا اتحايلت عليه وقلت له : اصبر البنت هتطلع لأمهـا جابت لك بنت وإن شاء الله بعد كده كله صبيان 0 وأخدتها ولفيت على كل المشايخ وبعد كام جلسة أكدوا لنا انها هتخلف ولد وضحكوا علينا وأخدوا فلوسنا 0 وأهى دنيا فى سنتين بقى عندها بنتيــن
والمعلم يونس طلقها بالتلاتة ورماها لى هى والبنتين !! يعنى أنا كنـــت ناقصة 0
نزلت دنيا من على السرير وهى تردد منك لله يامه !!
وأمسكت بأمها تهزها بشده ولم ترد الأم عليها وصرخت دنيا :
إوعى تموتى يامه 000