إحنــــا آسفيــــن ياريـــــــس !!!
عصـــــام ميــــره
........................
إحنا آسفين ياريس
ياريس إحنا آسفين ..
ياموحد لينا القطرين
ومينا وجيشه كانوا نايمين ..
ياصاحب غزوة حطين
وهديتها لصلاح الدين ..
يامحرر أرض فلسطين
عمار وأبوه دول يطلعوا مين ..
ياريس إحنا آسفين ..
.............................
إحنا آسفين ياريس
ياريس إحنا آسفين ..
يامقسم شعبك فريقين
أحمر وأبيض أبوخطين ..
ياريس محناش ناسيين
بدل السنة تحكم تلاتين ..
يامبهدل راسنا فى الطين
يادابحنا بأبرد سكاكين ..
ياريس إحنا آسفين ..
.............................
إحنا آسفين ياريس
ياريس إحنا آسفين ..
أبو جهل وفرعون مساكين
يجوا فين جنبك ياقليل الدين ..
وعرفناك وبقالنا سنين
كداب . نصاب . وأبو وشين ..
فى جهنم قاعدين لايصين
عايزين ريس يملا العين ..
ياريس إحنا آسفين ..
..............................
إحنا آسفين ياريس
ياريس إحنا آسفين ..
من بعدك محناش عارفين
خير بلدنا يروح على فين ..
دورنا شمال ويمين
مش لاقيين النصابين ..
اللى باعونا شهور وسنين
ع البرش فى طرة نايمين ..
ياريس إحنا آسفين ..
............................
إحنا آسفين ياريس
ياريس إحنا آسفين ..
بعد الثورة جالك عرضين
أولهم ورا البحرين ..
لاوزرا يقاسموك ملايين
ولاشعب يقول لك عايزين..
بدل السنة تحكم قرنين
لحد مايطلع لك قرنين ..
ياريس إحنا آسفين ..
............................
إحنا آسفين ياريس
ياريس إحنا آسفين ..
والتانى جاى لك م الصين
مليارات بدل الملايين ..
مهما تقول يفضلوا ساكتين
و ف حالهم دايما عايشين ..
تحكم وولادك الاتنين
يشبعوا لعب مع التنانين ..
ياريس إحنا آسفين ..
.............................
إحنا آسفين ياريس
ياريس إحنا آسفين ..
نسكت بتقول راضيين
نتكلم بتقول مجانين ..
حتى وقفنا بالملايين
قلت اتسلوا مش فاضيين ..
ونسيت إننا مصريين
لغير ربنا محناش ساجدين ..
ياريس إحنا آسفين ..
...........................
إحنا آسفين ياريس
ياريس إحنا آسفين ..
بهديلك منى رصاصتين
قبل الأكل بدقيقتين
تاخدهم و ف قلب العين
ترتاح وتريح ملايين ..
ياريس إحنا آسفين ..
لو هنقضى السنة صايمين
من غير أكل نبات جعانين ..
م الحرامية ننام خايفين
مش هنقول لك لأ آسفين
............................
............................
كلمات : عصــــام ميــــره
السبت يناير 21, 2017 8:39 pm من طرف مجدى الهوارى
موضوع: ياريس إحنا آسفين